អង់គ្លេស៖ ក្លិបបាល់ទាត់អាជីពនៅអង់គ្លេសបានចំណាយលុយលើពី ២ពាន់លានដុល្លារអាមេរិក សម្រាប់ការចុះហត្ថលេខានាំយកកីឡាករថ្មីក្នុងទីផ្សារដោះដូរកីឡាករក្នុងឆ្នាំ២០២២នេះ ដែលនេះជាការចំណាយច្រើនបំផុតមិនធ្លាប់មានកន្លងមកក្នុងប្រវត្តិនៃការដោះដូរកីឡាករនៅអង់គ្លេស។ នេះបើផ្អែកតាមទិន្នន័យរបាយការណ៍ដោះដូរកីឡាកររបស់ FIFA ដែលបានចេញផ្សាយកាលពីថ្ងៃសុក្រកន្លងទៅ ខណៈចំនួនតួលេខនៃការដោះដូរកីឡាករទាំងបុរស និងស្រ្តី ក៏បានឈានដល់ចំនួនកំណត់ត្រាផងដែរ។
តាមទិន្នន័យដដែលបានបង្ហាញថា នៅក្នុងទីផ្សារកីឡាករបាល់ទាត់ពិភពលោកមានការចុះហត្ថលេខាលើកីឡាករក្នុងទីផ្សារដោះដូរចំនួន ២០,២០៩នាក់ កាលពីឆ្នាំ២០២២ ដែលមានការកើនឡើងចំនួន ១១,៩ភាគរយ បើប្រៀបធៀបនឹងឆ្នាំ២០២១ ហើយក៏មានការកើនឡើងខ្លាំងផងដែរ បើធៀបនឹងទិន្នន័យនៅមុនពេលមានការផ្ទុះឡើងនៃវិបត្តិកូវីដ-១៩។
ក្នុងតួលេខនៃការដោះដូរកីឡាករចំនួន ២,៨៤៣នាក់ដែលមានតម្លៃផ្ទេរ ក្នុងនោះការផ្ទេរកីឡាករលំដាប់កំពូលទាំង ១០០ បានគ្របដណ្តប់លើចំណាយ ១ពាន់លានដុល្លារ ដែលស្មើនឹង ៥០ភាគរយនៃទឹកប្រាក់ចំនួន ២ពាន់លានដុល្លារដែលបានចាយដោយក្លិបនៅអង់គ្លេសកាលពីឆ្នាំ២០២២ទៅហើយ ខណៈដែលចំណាយសរុបលើសពី ២ពាន់លានដុល្លារ ពោលគឺឈានដល់ទៅ ២,២ពាន់លានដុល្លារអាមេរិកឯណោះ។
យោងតាមការឱ្យដឹងពីមន្រ្តីជាន់ខ្ពស់របស់ FIFA បញ្ជាក់ថា នៅក្នុងឆ្នាំ២០២២ កន្លងទៅ មានការចំណាយក្នុងទីផ្សារដោះដូរប្រមាណជា ៦,៥ពាន់លានដុល្លារអាមេរិកនៅទូទាំងពិភពលោក មានការកើនប្រមាណ ៣៣ភាគរយ ប៉ុន្តែនៅតែមិនទាន់ឈានដល់កម្រិតខ្ពស់បំផុតក្នុងកំណត់ត្រាពិភពលោកនៅឆ្នាំ២០១៩ នៅឡើយ។ ដោយឡែក ចំពោះទីផ្សារដោះដូរកីឡាករផ្នែកស្រ្តីវិញមានការកើនឡើងខ្ពស់ផងដែរ ដោយចំនួននៃកីឡាការិនីដែលត្រូវបានផ្ទេរមានចំនួនកើនឡើងសឹងតែទ្វេរដង ដោយកីឡាការិនីដោះដូរក្នុងកម្រិតអន្តរជាតិមានចំនួន ១,៥៥៥នាក់៕
